左丁山平素反對政府動輒干預市場，但也知道一些有心有為之士，一旦有權有勢，登上高位之後，便喜歡對普羅大眾、一般人民市民指指點點，指示他們如何生活，例如不要吃香口膠、不要吸煙、不要喝酒、不要吃快餐、肥肉餐、不要飲汽水，不要這、不要那，他們的出發點相信出於好心、善心，為人民的健康着想，不斷苦口婆心地勸告人民實行健康生活、健康飲食，若是人民不聽，便視乎干預者手上掌握有的議會票數有多少，索性在議會立法，禁飲汽水、禁吃垃圾快餐、向煙草產品抽重稅！
這些人當然不是壞人，是好人，但他們的干預傾向的背後有一個內含假設，就是：高官、大人物、教授、學者的知識廣闊，遠勝一般老百姓，老百姓屢勸不聽，是頑劣愚笨之徒，必須立法管治之。
往地獄之路往往由善意鋪成，精英治國往往到了最後成為獨裁治國，統治階層自以為高人一等，比老百姓聰明得太多，慢慢地，這些人便會操控議會民主，變相獨裁，到頭來徹底破壞了民主自由的精神。
所以左丁山對一啲高官出口干預別人飲食習慣，第一個反應就係：「關你乜事？」如食煙並非犯法，我食煙又關你乜事？會短命幾年喎，我都知，但係鍾意食呀！堅哥唔係聰明人咩，佢唔知吸煙有礙健康咩，但佢咪一樣要食煙！至於久食不肥，在耶魯大學校醫眼中，竟成為「罪狀」，可以向學生提出威脅：趕你出校，更係匪夷所思，呢啲人可能係control freak，唔管人唔安樂，但佢心裏以為：我係為你好啫，你唔健康呀！
唔抽煙、唔食漢堡包之類嘅垃圾食物，係由個人知識教導嘅，左丁山素來盡量奉行，但最憎俾高官或自以為站在道德高地嘅人指指貢，大搞社會工程（social re-engineering），叻人如彭博，在自由市場發大達，後發先至，竟可在財經資料發放方面，壓倒老牌嘅杜瓊斯，自不然有佢一套，但佢做咗紐約市長之後，就立法指導市民飲食，充份顯示佢嘅精英心態，以為自己在競爭激烈嘅市場仍然賺到大錢，一般人係笨過佢嘅。