阿里巴巴與騰訊（700）最近四出收購令科網股再成為投資界熱話，多間企業都話要做O2O（online to offline），賣金嘅周大福（1929）亦力谷O2O業務，又大玩微信推銷珠寶。作為舵手，主席鄭家純點都應該有玩過卦，點知佢好大反應咁話「冇」。
被問到有冇玩過網購、用微信之類，純官竟然大聲話冇，話唔識用呢啲嘢，亦冇Whatsapp，唔識打字咁話。佢跟手仲要好有道理咁講「我都唔明你哋做乜要留訊息，有嘢就直接打電話喇」。
咁有冇仿效超人投資科技公司？純官就突然謙稱自己可能「比較蠢，唔識睇科技嘢」，又話呢類投資一係就賺廿個開，一係就total loss，好高風險，「以前都有投資過，𠵱家好少喇」。
咁就梗係啦，純官早喺2000年科網股火紅年代，投資機頂盒唔見幾十億元，見過鬼仲唔怕黑咩？佢話晒都66歲嘞，仲咁搏咩？