近年唔少男藝人愛騷肌，噚日兩大型男黃曉明同張繼聰亦鬥晒身材，曾拍內地劇《神鵰俠侶》嘅黃曉明，早前為內地某內衣品牌拍廣告，大騷八嚿腹肌同人魚線，喺緊身內褲包住之下，曉明嘅「神鵰」徹底現形，十分吸睛，網友紛紛留言大讚偶像好man，仲有網友好葡萄話：「都是Baby（Angelababy）的！」
張繼聰狂操弗爆
不過，亦有網友唔信曉明身材咁正，質疑佢係咪P圖，仲話陰影打得太犀利喎！曉明就懶理讚美同批評言論，向大家提倡健康生活，佢話無論幾忙都要堅持運動，有好嘅身體先係生活最根本保障。
至於謝安琪老公張繼聰自勤力苦練朱古力腹肌後，備受廣告商垂青，吸金能力大增，最近成為瘦身產品代言人，並再度勁騷肌肉，赤裸上身嘅張繼聰一身肌肉弗爆，佢話為咗拍今次廣告，好努力狂操，仲獲老婆支持，佢甜絲絲話：「佢一向好支持我嘅決定，覺得我呢排生活規律咗，食嘢又節制，每日點忙都會做兩個鐘運動，係好有毅力嘅表現，仲讚我勤力㖭。」
撰文：馮仁昭
