陳果為電影《那夜凌晨，我坐上了旺角開往大埔的紅VAN》加插大量政治隱喻，可說為近年深受中港矛盾及香港政治因素所影響的港人發聲。其實撇除以上所說的政治命題外，電影還造就了一次師徒重逢的機會，說的是導演陳果與他親手帶入行的徐天佑、黃又南合作，十年沒拍陳果電影的又南坦言很欣賞陳果多年來依然有火，堅持完美。
撰文：文國駿
日前徐天佑及黃又南接受本報專訪宣傳電影《紅VAN》，二人皆由陳果帶入行，又南於01年演出《香港有個荷里活》，而天佑則是演出陳果執導的廣告入行，其後亦有參演陳果於99年執導的《細路祥》，對於多年後再次合作，又南以恩師形容對方，他說：「陳果係我恩師，我拍佢嘅戲嗰時仲係讀緊中五，casting完後佢決定要我讀完中五先開機拍，因為佢怕我入行後冇時間再進修，起碼會有個中五畢業，佢係會諗啲咁細微嘅導演。至於自己，最唔同嘅係以前白紙一張，第一套戲時乜嘢都唔識，阿果第一日開工只係叫我過吓鏡就收得工，嗰時心諗原來拍戲咁易，之後先知唔係嗰回事。我好欣賞阿果經常堅持100%完美，呢一點多年嚟仍然冇改過，有拼勁有火，係好榜樣。」天佑則表示：「阿果當年搵我拍廣告，我竟然同佢講最叻係演戲，當年佢叫我演，結果我演唔到出嚟，𠵱家咁多年後喺片場相處溝通，我終於可以喺佢面前演戲畀佢睇！」
林雪唱歌打氣
談到拍攝情況，天佑表示：「有一次都幾好笑，電影入面有好多演員，導演未必可以顧到全部人，所以一班演員每個都要好有狀態，有一日阿芝（卓韻芝）問我份人係咪唔講嘢，我話其實要入狀態啫，而華哥（任達華）喺片場就真係好似發叔，林雪個角色更加好似佢本人咁，有時都唔知佢哋係已經action咗定自己試緊戲。」
電影以群戲為主，每個角色的對白平均，一位演員講錯對白便會令大家重拍，問到二人會否因此而特別有壓力？又南笑言：「大家喺現場都有出於好意咁叫話慢慢嚟，但係咁講一講其實仲有壓力，好彩呢啲情況唔多，同埋每位演員都好專業。中大生同旺角MK仔都係拍戲經驗少，但都好熟手。」天佑則表示消夜時間過後大家便開始「認真MODE」，務求要在天光前收工，他更大爆林雪是提神靈丹：「林雪一食完消夜就會唱歌，令到大家精神啲，佢唱歌真係好好笑。」
反映政治困局
電影中紅VAN是香港縮影，車上17位乘客其實隱喻香港各個階層，問他們怎看自己的角色？天佑表示：「我個角色阿信喺電影只係有啲頭腦同埋冷靜，佢似現今社會上見到問題所在但唔會衝出嚟發聲，繼續諗吓先嗰啲人。」又南則表示他飾演的阿池頗能代表現今80、90後的年輕人，一有事發生便會隨時有股不怕死的堅持及幹勁。
電影除了以香港災難片掛帥，其實對人性亦刻畫得很深，天佑表示整套電影出發點的核心便是人性，皆因在困局當中，人性便會最明顯地暴露出來，至於電影充滿政治隱喻，他謂：「好意外，拍時我哋都冇刻意掛鈎，之後先知原來阿果將自己對社會睇法放咗咁多落去。」又南則謂：「都可以話𠵱家香港人好迷惘，所以對啲對白好有共鳴。」
