噚日係花旗集團傑出財經新聞獎香港區第5屆頒獎禮，上屆冠軍《信報》記者黃曉南分享由花旗贊助嘅美國考察活動，期間參觀紐約交易所，巧遇特首梁振英去「敲鐘」，仲話紐約6月好少落雨，但689一到就落大雨咁話。
一聽到特首呢兩個字，坐喺主家席嘅行會成員陳智思即刻被人開玩笑，叫佢選特首時要小心啲天氣，然後大家就追問佢係咪真係去馬選特首㗎。陳智思最初詐儍接招，反問大家邊個去選特首。講講下，華華就叫埋隔籬枱嘅馬時亨過嚟講講特首呢個題目，皆因肥馬一早開口撐梁錦松選特首。
肥馬過枱後幫陳智思解圍，講返唐英年早排講過，特首人選應係「才德兼備的年輕人」，陳智思就趁勢將個波掟畀全枱年紀最細嘅新世界第三代接班人鄭志剛。