立法會訪滬團呢齣大龍鳳圓滿落幕，睇見港澳辦主任王光亞見完泛民後，即刻上車chur支事後煙，就知佢自覺Good Show。八方聽聞除咗王主任呢位第一男主角，唔少隨團議員總結此行，話有幾位綠葉值得一提，皆因佢哋嘅普通話水平，為呢齣好戲增添唔少爆笑位，仲發現澳門崔世安，後繼有人！
曾鈺成寸爆郭家麒
邊幾位議員咁有喜劇效果？原來係兩男一女嬲字派；除咗兩位醫生包括梁家騮同郭家麒，民主黨黃碧雲亦加入亂煲冬瓜爆笑行列。八方聽聞爆笑度最高嘅首推梁家騮，有議員私下笑稱佢係「港版崔世安」，笑足一日仲欲罷不能，難怪立法會主席曾鈺成都叫佢唔好亂接普通話病人，以免斷錯症。
公民黨郭家麒堪稱泛民陣營表表者。有與會者透露，郭家麒喺王光亞面前發表一輪意見後，現場一片沉默中夾雜唔少訕笑聲，事關大家真係唔明佢講乜嘢，但王光亞等京官就相當冷靜，可能見慣大場面。惟獨曾鈺成忍唔住口，寸爆港大醫學院應將普通話列必修科。
比較起以上兩人嚟講，據知黃碧雲嘅普通話水平唔算太差嘞，但可能京官會發台瘟影響表現，據聞佢喺席間引述民調結果想講1％時，不斷「壹……壹……壹……」後啞口無言，然後彈咗英文「one percent」出嚟，最終要由議員提醒佢國語應該念「百分之一」。唔知崔世安見到佢哋三個，有乜嘢心得可以分享？
李八方
mailto:[email protected]