NBA常規賽今個星期完結，東岸前8種籽已經誕生咗，西岸亦得番最後1席，由灰熊同太陽去爭；灰熊周日就順利作客擊敗湖人，如果周一作客贏埋太陽，就可以確保季後賽席位。（now635及678台今日10:00am直播）
湖人一早已經出線無望，周日主場謝幕戰，點都唔可以太失禮，第1節米爾斯同尼克楊格都好勇，幫主隊領先27:23。但加素因傷缺陣，「細佬」、灰熊中鋒馬克加素就冇晒顧忌，連埋大前鋒蘭度夫，狂屈湖人內線，第3節就打出34:17嘅攻勢奠定勝局，最終以102:90擊敗湖人取得3連勝。灰熊「背靠背」周一就要作客太陽，勝負幾乎決定季後賽命運，事關灰熊贏波就肯定出線，今仗貢獻18分同15個籃板球嘅馬克加素講：「今仗係球隊出發鳳凰城前一個好考驗，我們仍然要為季後賽呢個目標而戰。」攻入24分嘅後衞干尼，就話太陽係一支好球隊，必須出全力先有機會贏波。
拜恩主場謝幕甩底
以14勝27負完成今季主場比賽，係湖人自遷往史達普斯中心球場以嚟最差嘅單季戰績，一眾星級球員都面目無光；原本今仗謝幕戰，球隊安排拜恩賽後發表宣言，多謝球迷一整季嘅支持，不過佢老哥因為頭痛而臨時no show，要尼克楊格代勞。其實一季失敗都唔係好大件事，拜恩只要養好傷，下季應該可以領紫金兵團捲土重來。
