上兩星期（3月31日）我在此講番2007年溫總叫停港股直通車時，嚇到我整污糟條領呔，估唔到4月2日內地傳媒就突然重提直通車，上星期仲落實埋互聯互通，七年無提過，我一攞番條呔出嚟就重啟，都唔好話唔邪！邪還邪，我見好多散戶朋友都將呢單料當新聞睇，好似唔係幾關自己事，甚至乎一些股評人行家都叫大家唔好咁雀躍，唔會好似2007年咁升得咁勁。
滬港通成另一次自由行
當然啦，2007年A股指數6,000幾點，PE近60倍，港股近15倍。時移世易，現在上證指數PE同港股差唔多，上證12倍、港股11倍，洶湧度當然弱咗好多。如果你唔明，可以用一個簡單比喻，當年就好似一缸水從60呎流去15呎，衝擊力梗係大，而現在就由12呎流去11呎，係慢慢流。以上睇法只係將焦點放落水流速度，相反，請你看看那缸水，2007年咁流法，唔使一年就倒晒，呢個亦好有機會係當年溫爺爺叫停的原因，但現在係細水長流，中央可以睇住嚟放，完全能掌握，缸水仲會越嚟越多。
有人話：「唓！得2,500億都唔係幾多啫！」大家細心想想，一日105億，如果日日爆額，一個月就完了，唔通李克強總理咁隆重宣佈，一個月就光榮完成任務咩，搞咁多嘢嚟為乜？
交接呀，規條呀，唔在講，「小加」這步棋亦係關鍵，大家唔覺得奇怪咩，又改交易午飯時間，又搞漲跌停板制，全人類反對，都照推。橫睇掂睇小加都成個醒目樣，無必要與民為敵，只得一個理由，阿爺叫既（有人話小加係推手，推得郁亞爺？我就唔信，煙幕啫！）。
2009年10月小加上任行政總裁，部署咗4年幾，唔通套大戲做一個月咩，呢場係大龍鳳，今次唔係送禮，係用香港的股份制作為內地金融改革的平台，套用內地媒體的話「滬港通是三中全會金融改革的體現……借鑑香港成熟資本市場的交易制度，監管規則，使股票估值更加合理，提高投資者的交易水平……」「香港作為人民幣離岸市場已10年，但規模仍有限，皆因投資產品匱乏，而滬港通為人民幣境內外雙向流通打開了缺口，有助海外投資持有人民幣，也有助境內投資者對外投資……」又打開缺口，又提高水平，咁宏大，唔通一個月就搞掂？唔係呀話？
可以咁講，一定係陸續有黎，仲記唔記得沙士後港樓、港股和港舖係咁升。點解？大家今時今日一定會講：「梗係啦，因為自由行吖麻！」，但大家請翻查報紙2003年7月28日廣東率先試辦個人遊，當日投資版提都無點提，大多數人都係咁「關我乜事」，連最受惠的酒店股都係分幾日升10%左右，有些升完仲跌番幾日。
結果呢？升左幾倍！所以有些回頭看是大泡沫的東西，一開始通常都令人掉以輕心，當年小弟膽粗粗掃股掃西九，賺了一桶金，純粹係因為值博率，無理由淨係得廣東㗎，應該陸續有來，就算估錯，只係雷聲大雨點小，咪最多買貴咗，當時沙士已經受控，四千蚊呎既尖沙咀西九，點都唔會太貴箒，但萬一自由行蔓延，咁咪起碼升五成（結果升了三倍)，睇左一輪樓，結果圖表上2004年初正式出訊號（見上期本欄），就即時瘋狂扑鎚。
講這些想當年，唔係晒命，我失手經歷又何其多呢？但2003年這役是決定性的一仗。若果那年夏天，你錯過上車的機會，唔使望門興嘆，因為時光居然可以倒流，現在港股直通車，就正正係畀你再次上番車既機會囉，我唔敢講威力有自由行咁勁，但點都唔應該懶懶閒，當睇「阿澤」普選逾百AV女這些娛樂新聞咁睇，最低限度都應該研究一下，正所謂「唔買都埋去睇吓啦」。
港交所長期受惠無走雞
睇乜？股票直通車梗係睇股票啦，「乜話？已經炒高晒？」總有股票長期受惠既，記住，但凡股票上升，只有兩個因素帶動，第一是盈利及前景，咁受惠呢單料的業務就當然係證券業，隨每日成交增加外，搞旺個場，就梗係幫國企來港IPO啦，但內地在港上市的證券股，往績麻麻，而本港土炮在內地銷售點唔多，做保薦人又唔夠人勁，冇乜油水。
諗黎諗去都仲係港交所（388），無論滬流去港或港流去滬，都要經過呢個水閘，大搞IPO就更加受惠；而第兩個上升動力，就係炒供求，突然多了一批內地中產（富豪一早已在港買）買貨，梗係買些耳熟能詳而A股無的股票喇，啲行家早已如數家珍，騰訊（700）、金山軟件（3888）、PRADA（1913）、金沙（1928）……
但數來數去就係漏咗一隻，就又係港交所，喂！港交所直情係名牌中的名牌，獨市生意，內地又無得賣，又唔係太怕美股跌，又唔會做假數，又唔會亂發CB，又唔會亂咁配股，上次配股係2012年12月17日，118元批股收購LME，到目前持貨年半，賺得20幾巴仙，都唔驚大戶套現喇，「咁！現在升了咁多喇喎呢刻先買？」無錯，圖表上應一早買了，現在升了20幾巴仙，上周五就可能「頂頂哋」，因為那些衍生工具發行商進貨，咁點買？逢低買些，做阻力，升穿埋阻力再加注，「吓？輸咗點算？」香港做了邊緣咁耐，突然做番橋樑，咁樣明輸，都要參與呢個大時代喇。
「吓？無錢買股票點算？」咁你都幾好，冇錢都睇財經版，咁咪睇吓你現在份工有冇錢/前景，冇既就放多些心機落去研究學股票，再考個大陸牌，上去教人炒港股囉，成間內地證券行，得你一個香港人，啲客想炒港股唔問你問邊個，你自己咪成間港交所咁，做獨市生意囉。
「吓？咁遠，點去？」算啦，你都係返去睇「愛．回家」罷啦。
張士佳
註：筆者持有港交所（388）及 金山軟件（3888）