溫拿樂隊前晚喺澳門開騷，鍾鎮濤（阿B）女友范姜同三個女鍾嘉晴、鍾懿、鍾幗捧場，另外仲有譚詠麟（阿倫）媽咪同兩個妹，曾志偉、葉童夫婦等齊齊捧場。人生經歷過無數起跌嘅阿B喺台上玩感性，結果搞喊范姜，話說阿B叫埋9歲囡囡鍾懿上台合唱完後，再唱咗首《家裡家外》，話要送畀佢身邊嘅女人，感激范姜同佢同甘共苦，承諾一齊走埋之後嘅路，范姜感動到眼濕濕。
成個騷有笑有touching，陳友俾大家玩，笑佢唱歌麻麻，曾經出過碟，不過只賣得8隻。到佢唱歌時，其他人一齊扮殭屍跳。
健仔被寸老餅
之後又玩金像獎頒獎禮，阿倫話陳友拎唔拎到金像獎都唔緊要，跟手頒咗個寫住「最佳男主角『下部你擔正』」獎畀陳友。接住又頒個長者卡紙牌畀健仔（彭健新），65歲嘅健仔笑話：「我以後可以用兩蚊搭公車。」之後阿B做訪問講到送歌畀范姜，佢話：「其實唔只送畀佢，仲有其他女性都付出好多。」
撰文：馮仁昭