立法會議員張華峰嘅馬運麻麻哋，對上一次拉頭馬已經係2010年年底嘅事，佢隻馬仔「再創新高」噚日竟然趁佢飛上上海同港澳辦主任王光亞會面嘅時候，開齋贏出，搞到佢冇機會喺凱旋門影相，由細佬張華新，同老友證券學會會長李細燕代為拉頭馬，細燕姐就帶埋佢嗰位廿幾歲嘅新抱仔現身。
細燕姐本身都係馬主，噚日佢隻「大埔福星」跑第7場，但跑輸，反而張華峰隻再創新高跑第2場首度跑出，細燕姐跟阿仔張琦與新抱仔一齊代為拉頭馬影相。原來細燕姐一年多前榮升奶奶，新抱相當後生，只得廿幾歲，樣子清純，噚日喺馬場成功吸引唔少眼球。
有份拉頭馬嘅仲有張華峰細佬張華新，佢幫阿哥打理證券行。大家係咪即刻喺相中尋找身形有番咁上下嘅仁兄呢？唔使搵喇，張華新冇張華峰咁重磅，普通身形，不過兩兄弟幾似樣，睇樣易搵啲。再創新高嘅練馬師徐雨石賽後就話，呢隻馬即使今季已經4歲，但係依然未熟，仲有進步空間，希望季內能夠再贏頭馬。