「兩個茶包要收我兩杯茶錢？」我眼前嘅女人，質問我。
我認得佢，佢好出名，出名……唔，你懂的。
「我頭先問過經理㗎啦，佢都話要收啊。」我其實唔係咁鍾意搬經理個名出嚟，因為我鍾意以理服人，而唔係恃勢凌人。
但係，我認得佢，佢係一個香港人。香港人同強國人最大分別，就係遇到有咩唔順氣，強國人可能會大吵大鬧即場反枱，但香港人就識得玩辦公室政治，會大叫「同我叫你經理嚟！」
可能，香港人太矜貴，覺得同我地啲侍應仔交涉，有失身份啩？
所以，我已經晨早請示咗經理點處置。
「你話我聽，你係咩地方打緊工？」
「經理，酒店囉。」
「咁咪係囉，如果佢喺酒樓飲茶，想壺普洱濃啲，加啲茶葉，梗係唔駛錢啦。但呢度係酒店嚟㗎，我地連杯水，都要收錢啦。」
「其他酒店唔知收唔收呢？」
「咁叫其他酒店出糧俾你好唔好？」
我如實將經理嘅決定話佢知。
「好！你敢收就得啦！」
等等，咩叫「你敢收」？家陣唔係拍變形金剛收保護費，點解要「敢」先收到你錢呢？你唔好拎住張稅單同稅局講「你敢收就得啦！」
其實，啲錢唔係我收，係間酒店收，我份人工唔會因為收咗你茶包錢而多一毫子㗎。如果我唔收你兩份錢，我估經理會同我講：「你敢唔收就得啦。」
咁你想我點呢？
佢話我係蠢侍應，我都覺得自己真係好蠢，我點解唔等佢投訴，然後叫經理自己處理呢？我點解要力陳己見，而唔選擇「必要的沉默」呢？
其實佢用咁珍貴嘅大氣電波嚟投訴「茶包裏的風波」，會唔會太浪費呢？點解唔監察社會其他唔公義嘅事呢？
不過，佢咁精，又點會咁做啊，我真係蠢。