央企老總人工低唔係秘密，即使貴為過千億元甚或過萬億元市值嘅上市公司董事長，實際上係官，人工唔可能跟和黃（013）大班霍建寧一年袋近1.9億元相比。內地三大電訊企業中移動（941）、聯通（762）、中電信（728）最新年報，三位董事長嘅年薪介乎120萬元至228萬元咋。
中移動市值1.5萬億元，作為呢間企業董事長嘅奚國華，舊年年薪227.5萬元，跟前年冇變動，佢已經係三位董事長當中，年薪最高嗰位。聯通董事長常小兵與中電信董事長王曉初舊年年薪分別係119萬元同埋156.5萬元（人民幣．下同），佢哋兩位就好些少，有得加薪，分別加薪16%同埋1倍。
相比其他上市公司高層動輒過千萬年薪，三位董事長嘅年薪確係少，不過真係冇得比，佢哋實際上係官，國資委將央企高管平均年薪定為70萬元，相比國務院各部長年薪得十幾萬，佢哋又算係高薪。