今季喺德甲所向披靡嘅拜仁慕尼黑，繼上輪聯賽輸俾中游嘅奧格斯堡後，上周六喺對多蒙特嘅褪色大戰中，更加主場大敗予對手0:3，贏咗聯賽就開始hea踢，認真無恥！
雖然話拜仁一早已經贏咗德甲，而且有歐聯同德國盃後顧，但係以今季拜仁嘅狀態，主場輸3球真係有啲過份。睇番拜仁嘅出場陣容，其實一啲都唔弱，「2R」洛賓、列貝利同隊長拿姆等主力悉數上陣，但係出到嚟就個個都hea，最終大敗真係失禮。
紐亞傷出無大礙
其實又唔可以怪晒拜仁嘅，始終餘下嘅聯賽對佢哋嚟講真係冇乜意義，搏得太盡搞到受咗傷踢唔到歐聯就大件事。佢哋嘅門神紐亞就係人辦，踢咗半場就傷出，要由年輕球員拉爾達入替。好彩賽後有消息話佢只係好小事，周中對凱沙羅頓嘅德國盃已經可以復出，拜仁迷可以放心。