上周筆者講到明，港股仍處牛皮時刻，但只要突然殺熊及真的因素出現，才會扭轉局面，結果疑似終極版的港股直通車出場，表面上好似扭轉了整個局面，筆者的微型對沖基金仔，也在港交所（388）停牌前3分鐘內狂掃中信証券（6030）及其他一些股份，但埋單一看，冇乜利錢！到底點解會咁呢？起初筆者以為只是自己突然又小逆境，但上周耳濡目染聽見今年以來很多對沖基金一敗塗地，筆者的基金損一損手叫造不算差。我心諗「吓！咁都算唔差？」可能是自己要求高吧。但如市場有這個現象出現，那麼代表着背後有甚麼情況在發生呢？其實對沖基金敗迹可尋。
科技濠賭股大逆轉
首先，過去18個月一直強勢的科技股、濠賭股、再生能源股等等，在3月份當中完全大逆轉，此等逆轉並不是普通力度，而是輕輕鬆鬆都跌三四成，走得慢啲都輸到直晒。此時大家仍然認為科網股不死，不少都繼續死揸作主力股，唯有狂沽其他副選，使其他副選跌到唔見咗，再引發其他火燒連船。一弱。
再者，過去18個月，也是莊家股的天堂蜜月時間，認識朋友專門四出搜集莊家然後跟隨之，過去半年十分風光，但行內都知道，所謂幫莊等只是紙上富貴，多數是白白癡癡的。不少莊家股由2月開始散水，這些莊家散band之時的跌幅，隨隨便便跌50%，可以話係投降輸一半，已經叫做好，萬一停賽，復牌無期，可以即時收檔。望佢復牌咩？一開市已再跌30%，問你死未！而很多莊家股都是市場某一類資金的泉源，水源一失，市況更弱。二弱。
近大半個月主要只有中資股全面跑贏大市，但如純粹硬揸中資股已經大幅跑輸大市幾年，叫造跑贏一頭半個月，近期反彈只是令賬面虧損減少，利潤仍遙不可及。最惡毒的就是半個月的努力竟然俾滿以為一定受惠的疑似港股直通車最終一鑊打謝！點可能估到！不是一鑊打謝嗎？平保（2318）、國壽（2628）太保（2601）等竟然受惠不了，利潤在一兩日間完全消失。即係點搞都輸。本來強強哋的又突然轉弱，三弱。
仍然有一些醒目仔，好似中國銀盛七巧基金的吳家順，晨早走晒科技股，還要反手沽空騰訊（700）獲小利，再將資金轉移到其他類別的股份。超勁啦！就算英國皇家郵政如此穩健的股份，3月都要急跌，而筆者卻竟然在急跌前已經止賺成功避開（剛剛補回）。結果如何？埋單計，3月都係突然輸咗鑊，仲有係甘嗰隻，令人好意外！四弱。
一個健全板塊都冇
五六七八弱、仲有你以為超勁沽其他嘢做對沖咩？指數挾死你。你轉移陣地到其他市場咩？一樣跌瓜你。你搬錢到人民幣做槓桿存款賺少少利息無事喇啩，原來仲大鑊。抽中咗個特制金幣啦，贏梗喇啩，點知收唔到封確認信！
更恐怖的是筆者每周所做的詳盡功課，竟然找不到一個板塊是健全的，咁你話個市點可能好？冇新錢到、新因素找不到、市場火燒連環船，指數好強無人贏錢、毫無個別板塊明顯勁，筆者認為這個情況相當奇怪，奇怪到筆者認為本周市況很容易再有一個明顯的震盪，完成此震盪港股又進入一段時間的整固期，所需要的時間可能較我們想像中長，所以筆者跟大家講，不要在不適合時候進攻，你只會死得更快。若用古時攻城作例子，攻城失敗只會傷亡慘重，請不必急着追，等適當時刻才能事半功倍。試吓突襲啦，今周筆者很有興趣做三幾日突襲，突襲的最佳拍檔一定是期權，就在本周復活節之前沽到排牛鬼蛇神復活唔到啦！至於冧巴呢，如果即市有心水，筆者會在收費版中的video提及，暫時仍然免費。無冧巴唔好罵，留低現金遲下大把貨掃。祝復活節後大家復活，月底見。
註：筆者基金客戶持有騰訊（700）及英國皇家郵政相關權益，並隨時買入或沽出。純綷個人意見，絕不構成買賣邀請。
吳家順
中國銀盛資產管理董事、Mensa會員
http://www.facebook.com/1234567.com.hk
本欄逢周一刊出