滙豐近年有份贊助香港七人欖球賽，其實滙豐喺單車運動都係一大icon。噚日有近千名員工同家屬出席滙豐贊助嘅「博愛單車百萬行」，合共有6,000名參賽者，首次踩昂船洲大橋，聽聞平日有踩開單車嘅滙豐一姐馮婉眉都有出席，但只係跟「B餐」謝安琪主持咗啟幕禮，並冇落場踩車。
但既然做得贊助商，滙豐當然有派高層參賽，滙豐香港工商金融主管陳樑才噚日做代表帶隊，踩咗大約10公里車，咁短路程應該冇乜難度。
滙豐一直都有類似贊助，呢個博愛單車百萬行就由2009年贊助至今，仲有另一個更響噹噹嘅贊助，就係滙豐環南中國海國際單車賽，滙豐前大班霍嘉治就曾經以一身環法裝束，飆車踩過中環繁忙路段，佢當年仲有份帶隊參加企業挑戰組。