內地藝術家梁克剛3月遊覽法國普羅旺斯，順道採集當地新鮮空氣。佢仲用咗個可密封玻璃樽，裝滿普羅旺斯嘅清新空氣，樽上面仲用法文寫住「法國，普羅旺斯的空氣」。呢樽「法蘭西空氣」3月尾拍售，成交價5,250蚊人仔，真係夠買一枝法國靚香檳。不過，梁克剛其實想借今次拍賣表達對內地空氣質素轉差嘅不滿喎。
有藝術家借拍賣宣示空氣污染問題；有人就趁機掘金。自封「中國低碳第一人」嘅陳光標，年初喺南京街頭兜售「好人牌空氣罐頭」，仲分咗「寶島台灣」同「江西井岡山」兩種，標價5蚊人仔，即開即聞。淘寶都湧現各式各樣嘅空氣罐頭，售價由2蚊人仔到300蚊人仔，分別嚟自西藏拉薩、貴州甚至日本富士山。富士山嘅新鮮空氣罐頭標價168元人仔。淘寶統計指數顯示，空氣罐頭最近30日嘅成交指數升咗9倍添。
每一口空氣都可以係商機，皆因國家主席習近平嘅一句話。他表示空氣質量直接關係百姓嘅幸福感，將來貴州可以賣空氣罐頭。就係咁，貴州、河南、湖南都爭住賣。
內地商戶一鼓作氣發展空氣罐頭，講求包裝多於空氣質素。產品又需要大量鋁罐同膠樽，跟低碳減排等環保概念背道而馳。要改善內地空氣問題，藍天重現，睇怕要等多陣。
C+B
本欄逢周一刊出