【喜歡飲酒】
「飲得之人」古有「劉伶酒」（劉伶為竹林七賢之一）雅號，昔日滙豐華人，原來私下亦有個「劉伶會」，由滙豐首位華人副總經理劉智傑，及該行前執董柯清輝（後轉任恒生大班）等管理層發起，並邀請獅子行內同道中人參加；據滙豐舊人憶述，薛太是劉伶會內女中豪傑，有「酒筲箕」美譽。
謙稱「幾喜歡飲酒」，但笑說「無話過自己係飲得之人」的薛太，指劉伶會「初時由劉生、柯生等發起」，藉新春佳節，同事相約在外，「摸吓杯底」，聯誼溝通，後來定於每年初七，「人日」碰杯。
向上司敬酒 上司一定飲
酒逢知己，她說聚會時，大家「平起平坐，暢所欲言」，唯一規則是要有酒品，互相尊重，「譬如你向上司劉生敬一杯，佢無得話唔飲，一定干咗佢……」，新人加入，亦先飲為敬，「罰飲3小杯紅酒」。
祖籍浙江紹興（後遷移廣東南海）的薛太，酒量原來與「幼承庭訓」有關。薛太解釋，「Daddy有四個女，佢認為女仔要識飲吓酒先唔會蝕底」，所以自11歲起，姊妹們已獲每人分派一茶匙方式試酒，「葡萄酒、威士忌、拔蘭地、竹葉青都有」。父親相信，試過後，酒精便不再神秘，年輕人成長時期，不會受其蒙騙，「我都係咁教個仔……」