港大同中大噚日舉行兩大校長盃足球賽，今次係由港大邀請中大踢友誼賽。啱啱嚟港履新近兩星期嘅港大校長馬斐森，仲親身落場應戰，開波前佢同中大校長沈祖堯擲公字，港大先贏一仗，由馬斐森一腳大踢開戰，但港大未有佔主場之利輸波收場，馬斐森首嘗敗仗。
自嘲handicapped
雖則有新校長披甲上陣咋，但港大球員一樣堅踢；八方所見，由於港大多數從右路進攻，唔知係咪因為咁，踢左翼嘅校長全程只係「搓」咗幾腳，半場前已經被換出唞唞。中大隊伍亦冇因為馬斐森落過場而放水，起勢狂攻，龍門柱都中咗四次，但係雙方守門員都好硬淨，上半場互交白卷，至下半場先各有進賬，中大最終贏2比1完場。
馬斐森太太Christina噚日都有到場，坐喺觀眾席為出場十幾分鐘嘅老公默默打氣。對於「係咁意」咁揩吓波皮，馬斐森笑笑口話呀，自己對上一次full gear落場已經係35年前嘅事，𠵱家自己係「handicapped to my team」，話快脆咁被換出去、畀其他腳法更好嘅隊友踢仲好啲，但佢都好enjoy呢場友誼賽，睇到完場㗎。
咁上任後呢兩個星期有做過啲乜？馬斐森話好忙㗎，上星期同學生打過招呼傾幾句、仲落過starbucks打個轉，好多學生都要求同佢合照；上周五佢亦同學生會面，傾咗好多議題，包括六四同埋佔領中環，亦有談及一般學生表現同紀律問題等。佢認為有不同觀點、又能夠公開討論係好健康嘅事，會好好保護呢個環境。
佢仲笑稱上任前預計自己會備受關注、面對好多訴求，實際又冇想像中咁多噃。
李八方
mailto:[email protected]
