巴西今年主辦世界盃，舉國上下都恨第6度攞世界盃恨到發燒，身為籌委會主席、「大哨」朗拿度當然都好想國家隊再揚威。身為大業主嘅佢，見國際足協主席白禮達搵屋，喺世界盃期間短住，就拍心口將自己位於里約熱內盧萊布隆海灘邊嘅豪宅租畀佢，就算話大嗱嗱收番50萬歐元（約535萬港元）租金，仍難免換嚟私相授受之嫌。
國際足協代付貴租
朗拿度球員時期幾風光，相信有一定資歷嘅球迷都知，退休後佢經商有道，仲開埋經理人公司，旗下有尼馬、盧卡斯洛迪古斯等森巴球星，想唔豬籠入水都幾難。難得大哨搵到錢又識投資，喺巴西都有唔少物業，所以當佢知道白禮達搵屋，準備世界盃期間入住，就即時出手相助。
據巴西《環球體育報》報道，朗拿度就租出位於里約度假勝地萊布隆海灘邊嘅一幢豪宅，等白禮達同一眾國際足協高層入住，豪宅對住海灘，風景怡人，又近決賽場地馬拉簡拿球場，非常方便。白禮達短租6星期，不過大哨竟然索價50萬歐元，計落每日差不多要成1.5萬蚊港紙，拍得住5星級酒店，不過呢筆租金由國際足協畀，唔使呢位瑞士老人家操心。
最令列強關心嘅，係朗拿度呢位包租公會唔會喺呢段時間近水樓台，乘機接近國際足協權力核心，影響佢哋嘅安排，尤其係選用球證等決定。講真，白禮達之前連任已經引發賄選傳聞，今次都唔識避嫌，真係戥其他球隊擔心。
尼馬新歡超hot
不過大哨咁努力鋪路，都要靠班師弟仔努力，先至有機會6奪冠軍；好似前鋒尼馬，本身喺巴塞隆拿已經踢得麻麻哋，仲風流史不絕㖭。最近有傳佢搭上巴西20歲索模蘭絲（Gabriella Lenzi），睇蘭絲個人instagram，身材又真係幾惹火，希望已為人父嘅尼馬識自律，世界盃完咗先同女友放縱啦！
