能夠喺娛圈成為一線阿姐，肯定有佢本事之處，「熱辣辣」就係一個好例子，佢嗰種積極簡直嚇親人，最近「乜太」公司要開拍大片，請咗一班老友大明星嚟演出，乜太人緣咁好，大把明星答應嚟幫手，其中女主角定咗畀「大口妹」演，點知熱辣辣知道後打畀乜太，話可唔可以畀佢演女主角，叫大口妹演另一個角色，但因為乜太一早同大口妹傾咗，所以冇答應佢嘅要求。
爛戲照接
其實早兩年熱辣辣傾緊部新戲時，睇完劇本唔多喜歡，但佢冇推，仲去說服已推咗部戲嘅「蠟燭」做男主角，蠟燭話：「你明知劇本唔好，點解要接，仲要我一齊演出？」熱辣辣話：「劇本係唔好，但我哋唔接就將機會讓咗畀人，點解要增加自己嘅競爭者呢，接啦！」佢嘅諗法都幾奇怪，關仁都要向佢寫過服字！
撰文：關仁