四月九日，幾張報紙都有一段好大嘅花邊新聞，就係耶魯大學威逼一名華裔女生增肥，校醫話女生太瘦，不健康，可能要開除佢學籍，於是呢位女生每日搏命食，一日八杯雪糕，但食極唔肥……
呢段新聞幾有趣，左丁山睇睇吓，「蘋果」圖片特別大張，於是望真啲，咦，識得嘅，呢位女生，相片中人名叫Frances Chan，咪係三月中寫一班耶魯學生到新亞書院交流嘅其中一位？本欄在三月十八日講YUNA交流，就係講呢班學生，佢地三月十日星期一到港，當晚在新亞教職員餐廳「雲起軒」受院方款待，耶魯校友會代表及雅禮協會之友（左丁山係其中一名）亦有在場，當晚識咗兩位亞裔女生，一位姓Nguyen，當然係越南裔，仲以為佢係「越南船民」之子女，點知佢話係來自河內，方知越南已變遷得好緊要，河內嘅中學亦可以產生尖子入耶魯，與四十幾年前啲「耶魯學士」在新亞教英文時，日夕辯論越戰，唱鍾拜亞斯嘅反戰歌曲好唔同，恍如隔世咯。另外一位就叫Frances Chan，仲以為佢係廣東人姓陳，點知佢話：「我父母來自台灣，落籍新澤西州，唔係姓陳而係姓詹。」此女孩十分瘦小，似足香港細路女，於是同佢傾多幾句，話俾佢聽本人在蘋果寫稿，點知佢立即瞪大眼：「蘋果？壹週刊？在台灣好大影響力㗎，我哋屋企都有睇，你識唔識Jimmy Lai㗎？」唔，叨肥佬黎之光，呢位耶魯小女孩同左丁山特別好傾，返去耶魯之後，仲來電郵通知左丁山佢會到韓國做交換生，到時會抽空嚟香港過一個周末，因為受到新亞學生熱情招待之後，佢地覺得香港呢個城市好可愛。
估唔到未再次見到佢之前，已在報紙上見到佢嘅增肥新聞，好彩耶魯校方認錯啫，否則打起官司上嚟，耶魯輸硬。美國有啲人緊張過度，既怕人肥，又怕人瘦，例如彭博做紐約市長時，就立例學童唔准食呢樣，唔准食嗰樣，其實每個人食乜，有佢嘅選擇權，關政府與大學醫生乜事吖，在一個常把人權掛在口邊嘅國家，竟有超一流大學嘅校醫不滿意華裔女生太瘦，簡直豈有此理。