體壇拾趣：
居里領勇士入季後賽

勇士上周四主場意外輸咗畀金塊，慶功宴要hold住先，不過事隔一日，喺上周五對住西岸排尾2嘅湖人，勇士班球員梗係唔會再咁失威，卒之大勝湖人112:95，終於攞到張季後賽入場券喇。
勇士今場有趕及復出嘅大衛里爾交出雙雙，不過最大功臣始終都係星級戰將史堤芬居里。居里今場攞到30分、10個籃板同12次助攻，係個人今季第4次大三元，同公牛嘅諾亞同埋溜馬嘅L史堤軒臣並列今季NBA 3雙王。唔單止咁，居里仔仲係繼名宿張伯倫之後，近51年嚟第1個單季攞到4次3雙嘅勇士球員㖭。
繼92年之後，勇士終於再可以連續兩季入到季後賽，都算係一項歷史紀錄。不過，相對於上季嘅激動慶祝，今場贏咗波之後大家都好冷靜。教練馬克積遜解釋：「我哋一早已經預咗，所以唔需要瘋狂慶祝；球隊𠵱家有更遠大嘅目標。」

H班尼斯冧掂女fans

入到季後賽值得高興，不過勇士嘅H班尼斯就喜上加喜。話說之前對金塊，有位叫Susan嘅球迷舉牌向班尼斯求婚。由於Susan事先已喺twitter公告天下，班尼斯就好有心咁預備定驚喜回禮，寫咗張心意卡送畀呢位癡心女球迷，仲引用咗經典笑片《Dumb and Dumber》嘅金句，𠱁得佳人不知幾開心。佢之後仲好高招咁喺第二日上載啲相上個人社交網站，當眾多謝Susan。兩位有冇下文就唔知，不過佢咁識冧fans，睇嚟前途無限。