好喇，繼續係動人亞姐時間。今日一眾前亞姐齊集大埔總台出席亞姐選舉啟動禮，嘉賓花姨一出場，已經打低晒其他師妹，佢件經加工過嘅Victoria's Secret，真係「驚」豔到不得之了。
花姨話自己係最高學歷嘅亞姐，因為讀緊博士學位，又話自己畫畫畫到被邀請20號去申請非物質文化遺產，加上今日王征嗰個嚟香港買樓（王生爆響口）嘅老友，將佢是日即席揮豪、打算獻畀亞姐嘅一幅墨寶以25萬賣咗，所以佢話自己嘅畫希望可以賣到100萬咁話。
問花姨當日會唔會收起性感？佢就話要睇天氣，如果落雨，就會冇心情性感；不過花姨就嫌自己肥喎，又話自己唔明點解專心寫字都會肥。
講講下，花姨又話想徵婚，仲叫在場記者幫手「打價」，因為佢想登個頭版廣告，又話佢嘅廣告會幫到報紙銷量添!最勁嘅係，成廿年冇拍拖嘅花姨話，自己喺95年以47歲之齡選亞姐，已經係美魔女；依家，佢就係「純美魔女」！點解？佢話：「因為我純品囉，我畫到畫到國寶級，仲有邊個可以超越我，全部排喺我後面啦。」
咦，咁後輩羅霖、萬綺雯同朱潔儀三個加埋所唔夠你一個嚟啦！