唱了千千闕歌的陳慧嫻，轉眼入行30年，現年48歲的她由儍女變熟女，不介意別人知道年齡秘密，曾患焦慮症的她不再焦慮，自豪外貌及心態都不老，笑言只會拉筋不會拉面皮。雖然走了一半人生，慧嫻仍孑然一身，以前戀愛大過天的她，今日對愛情不再有憧憬，淡然地說：「心如止水！」
撰文：余燕儀
記得18歲那年，陳慧嫻跟黎芷珊、陳樂敏合作推出處女碟《少女雜誌》，後來芷珊轉做藝員，陳樂敏早已消失樂壇，而當年憑《逝去的諾言》一炮而紅的慧嫻，30年來歷盡高低起跌，6月再踏紅館開紀念騷，她日前接受本報專訪時說：「我49歲啦。」助手更正：「未生日。」慧嫻笑說：「冇所謂，我對自己有信心，最重要個樣同心態唔似，有啲人好緊張每一條皺紋，我咁隨遇而安、赤子之心反而有幫助，好過你敷一千次mask，我只會拉筋唔會拉皮，不過我唔反對人整容，我未見到自己有需要。」
入行30年，慧嫻沒有太大感觸，她說：「我覺得30周年應該返嚟開演唱會，好多歌迷投訴我顧住內地，我唔係轉戰內地，咁啱經理人上去開藝人學校叫我剪綵，佢嘅內地拍檔提議我上嚟唱多啲，呢幾年我去過哈爾濱、瀋陽，原來咁遠都有歌迷。」是否搵了很多人仔做富婆？慧嫻坦言：「都有搵，富婆定義係乜？過億就冇啦，只係可以生活，今時今日我哋呢輩再唱歌，唔係為賺錢，只係鍾意唱歌又技癢，想同新嘅音樂人合作，唔想只係集體回憶，仲係以前嘅陳慧嫻。」
怕戀愛變吃力
曾患焦慮症的慧嫻，現已痊癒了，她笑說：「𠵱家叫『無焦慮症』，以前上台好緊張，驚到鼻哥窿冇肉，𠵱家冇以前咁擔憂，我諗以前爭上電視節目嘅人好多，寶麗金又多阿哥，我呢啲妹妹機會少。呢幾年巡迴商演係好好嘅練習機會，畀我放膽唱減低緊張，以前只顧住唱歌，唔記得表達情感，𠵱家真係唱出感情。」
愛情方面，慧嫻依然是一片空白，當年跟謝國麟醫生分手後，一直再沒拍拖，慧嫻說：「以前拍拖一個接一個，重心擺喺另一半，全世界只有佢，最後一個男友係醫生，分手好多年，慢慢由唔習慣開始，心態變得獨立，𠵱家已經唔再覺得需要有男友，生活都好充實。以前聽人講，心如止水好舒服，當時唔明，𠵱家慢慢心如止水，感覺好舒服，反而突然叫我好忐忑再去戀愛，喺一個好靜嘅湖，擲石仔落去泛起漣漪，會覺得好吃力！」
【淡淡然冧Hi-Fi友】
陳慧嫻近日推出新碟《By Heart》，重新演繹八、九十年代的經典歌《忘不了你》、《藍月亮》、《梨渦淺笑》及《Lonely》等，慧嫻說：「隻碟感覺好淡然，Hi-Fi碟唔好死人冧樓唱法，嚇親Hi-Fi友。」對於鄧紫棋（G.E.M.）巨肺嗌咪式唱腔，慧嫻說：「佢係適合唱呢類歌，佢嗌得好聽好巨肺，反而叫佢唱一隻好平淡嘅歌，表現唔到佢嘅特色同能力，而且內地鍾意聽呢種廝殺式唱法，G.E.M.真係唱得好好！吳雨霏唱嘅快歌都好型，慢歌亦有吳雨霏式感情。王菀之就聲音特別，又可以玩古怪形象。」
化妝：Marsha Ma of A&V make-up school
髮型：Lorraine Lam of Hair Culture
場地：富豪九龍酒店