「Sorry呀主席，今晚大戰當前，我都係唔嚟睇人攞獎嘞！」「喂你唔係玩嘢吓話，波個個禮拜都有得睇啦，金像獎一年一度咋！」「說話唔係咁講，我作為利記粉絲，等咗今日廿幾年嘞。」「得得得，我諗計，你一定要到呀。」
大會果然從善如流，喺頒獎現場擺咗幾部電視機播波，「各位嘉賓、各位朋友，過去一年本地影壇百花盛放，新人輩出，危中有機，機中有危……」志偉哥嘅開場白照舊語重深長，講講吓……咦，嗰邊開波嘞喎。「做人要分莊閒，𠵱家唔係你揀，係我叫你揀。《掃毒》」擲毫啫，球證唔使咁寸吓話。「一個拳手，一定要建立自己嘅節奏。《激戰》」羅渣士咁肉緊喺場邊嗌出嚟，有鬥心吖！「世界所有的相遇，都是久別的重逢。《一代宗師》」嘩唔係出高路托尼啩，見佢同耶耶托尼攬晒咁，兩兄弟好耐冇見咩？
嘩，咁快又入波，Yeah！史杜列治又跳機械人舞嘞，「流連城市，人來人往，為了理想起舞吧！《狂舞派》」不過，都係台上面呢個妹妹仔阿花跳得好睇啲。最佳XX得獎嘅係《殭屍》！唔係吓話，蘇亞雷斯你又一啖咬落人哋度，吳耀漢上身咩，死囉！咁就俾曼城追成平手，大特寫入面謝老四唸唸有詞咁，唔知係咪講緊程輝啲對白呢，「我呢廿幾年，咩聯賽冠軍都未攞過，我唔想到退休嘅時候，連呢件值得回憶嘅事都冇。《激戰》」
「情與義，值千金……《掃毒》」觀眾席上面阿加歷查、阿杜格利殊一齊口噏噏，咁似唱緊秋官腔嘅？
嘩插水呀肯定，喂球證你唔係咁都畀12碼啩！學陳友話齋，「X！唔好話道士吖，殭屍都冇X晒啦。」正義嘅球證去晒邊呀？你哋點樣見自身，見天地，見眾生呀。
錢小豪喺戲入面話，「人生比電影更荒謬。」計我話，佢睇得波太少箒，正所謂希望在明天，好戲在後頭呀。
賽後總結，影帝話「對手好強，我贏係有運！」至於輸波嗰隊就話「對手好茅，我哋輸係冇運！」
KEYMAN
now TV主持