今晚《東張西望》除咗繼續就前無綫PA「偽文豪」爆料單嘢「消毒」，請來「Chok峯」同「臭蝦哥」等人受訪，連聲爆粗，又擺埋網民留言上去，呢啲「網民」包括曾指摘「偽文豪」嘅王晶同曲線暗寸佢嘅李力持。頗堪玩味嘅，《東張》仲引用埋指摘前總經理陳志雲嘅網民留言，該網民直指:「陳志雲都做過無綫嘅阿頭咁多年，既然佢明明白同情PA，何解佢唔改革幫助PA呢？志雲大師絕對有權做好啲改革0架喎。」
跟手兩位主持又用番陳志雲為「偽文豪」本書寫序一事，指有報道引述陳志雲冇睇過本書，又有報道話陳自認睇過電子版本，但跟手再話另有報道又話陳志雲承認自己「未有詳細閱讀本書就寫序係不當嘅，對此深表歉意。」主持再謂:「整個過程反反覆覆，不知孰真孰假。」
最有趣嘅係，《東張》引用嘅網民留言，都係來自較溫和同高度集中無綫fans(有人話係「打手」及「五毛」)嘅香港討論區，而非高登討論區。高登仔即質疑無綫點解只用插偽文豪嘅留言，但撐佢嘅如區家麟等卻隻字不提，又直指其公器私用，更有人話:「無綫咁做，只會令人更加想買本書。」、「清者自清，用成兩集去解釋，擺明講中事實。」
日前無綫行政主席梁乃鵬指摘陳志雲為偽文豪寫序不當，指除非陳真係好了解個作者、好認同本書所講嘅嘢先至好寫，但梁指陳未做到上述兩點就為之寫序，此舉「值得商榷」。依家《東張》咁樣擺陳志雲上枱，其動機為何，難免令人揣測。而《東張》今日引述嘅陳志雲「致歉」內容，詳細係:「我有睇過梁乃鵬主席嘅質疑、批評、意見、提點，我接受。如果我唔認識嘅作者，我先要認識佢，好審慎睇佢作品先應承寫序，如果因為寫咗個序、令朋友、同事唔開心或不便，深感歉意。我用意唔係咁，見一個年輕朋友創作，就支持下。梁乃鵬主席係我尊敬前輩，佢提點我接受。以後寫序點做，跟佢準則去睇都啱。」
