【本報訊】王維基昨午5時半召開員工大會，再次宣佈大裁員消息，會上氣氛沉重，一片哀愁。雖然不少員工對公司裁員早有心理準備，但仍難掩失望之情，部份人是在港視去年底宣佈會以流動電視形式開台後，重新獲聘，結果昨日再被裁走，在短短半年內兩度被迫離開港視。
港視網絡職工會理事長楊志豪昨稱，「好大部份員工對政府做法都好失望，對電視業心死，睇到未來香港電視圈會繼續一台獨大，呢行冇得復蘇」。
藝人續撐王維基
十壯士之一、綽號「蜜瓜」的港視助理編導麥家恩也被裁走，「完成手頭兩套紀錄片後期製作，大約7月中離開。我覺得王生意志好強，比我哋都強，但呢個政府連小小機會都唔俾呢間公司。我就算將來轉行，政府都可以因為唔鍾意嗰行而變成咁；就算再申請免費電視牌照，之前用盡全力都證明唔得，其他電視台又會阻止」。
藝人艾威已約滿港視，早前不獲續約，但他仍力撐王維基，「無論點樣，我都係支持到底。講到炒人，我覺得係遲早嘅事，正如一間餐廳開唔成，留咁多廚師喺度都冇用，希望成件事遲啲會有轉機」。另一藝人「港版半澤」陸駿光說：「呢個係政府問題而唔係王生嘅問題，無論如何我都會支持王生同港視。」
老牌演員郭鋒對公司裁員也感無奈，「唔敢講啲乜，因為呢大半年太峯迴路轉，玄學家都冇一個敢出聲。裁減員工當然可惜，但呢啲係政府問題，希望佢哋只係暫時離職，將來大家再見面。」藝人陳錦鴻稱相信王維基的部署，「佢係上市公司主席，唔可以為個人榮辱，怕俾人話唔夠情義就唔做嘢，點都要向股東交代」。