周四嘅NBA常規賽上演德州打吡大戰，馬刺以109:100贏咗小馬，除咗錄得球隊史上最佳嘅第30場作客勝利之外，個聯盟1哥位更加穩如泰山，雷霆基本上冇得追。相反，小馬輸波後跌番落第8，仲比前後夾擊佢哋嘅太陽同灰熊打多兩場，形勢不妙。
鄧肯受傷嚇親Manu
柏加背傷缺陣，但對於已經習慣畀GDP 3老輪休，為季後賽做準備嘅馬刺嚟講，都唔係一個太大嘅問題。但係今場波都曾經出現過一個令馬刺躉驚嚇嘅場面：鄧肯喺第1節中段搶防守籃板時，落地唔小心令膝蓋過度伸展，一度倒地抱膝。而隊友真路比利（Manu）事後都話當時覺得好擔心。不過，鄧肯用行動證明咗自己冇事；短暫離場之後都落番場繼續比賽，最終仲攞到20分同15個籃板㖭。鄧肯賽後亦向球迷大派定心丸，話只係虛驚一場，冇咩大礙。
贏埋今場，馬刺常規賽已經連贏小馬9場，若然目前排名不變，兩隊季後賽首圈碰頭嘅話，馬刺梗係秤先。不過，小馬教頭卡里斯利好有勇氣咁話，自己隊波到時都唔一定輸梗喎。
西岸尾班車爭崩頭
其實季後賽要鬥馬刺又有咩好怕喎，對小馬嚟講，入唔到季後賽先係終極噩夢。雖然今場輸波，但係排緊第6嘅勇士同日主場都僅僅輸咗畀金塊99:100，暫排西岸第6但季後賽席位仲未攞到手，所以𠵱家4隊都仲有機會爭到西岸尾班車嘅最後3個位置㗎。