曼聯喺歐聯出局之後，今季都冇晒奪標希望，喺呢個咁令人沮喪嘅時候，韋碧克、湯卡華利同艾舒利楊格呢3個衰仔，竟然喺對拜仁慕尼黑賽後即刻走去開party，仲俾人影晒相。喺相度見到湯卡high到跳晒舞，韋碧克就一直同個女仔密密斟。好心你哋生性啦，傳聞球會要進行大清洗，有湯卡同楊格你兩個份㗎！據知呢張多達10人嘅清洗名單中，冇魔迷最希望佢消失嘅領隊莫耶斯，反而有一班為球會立過唔少豐功偉績嘅老將，好似傑斯、艾拉同里奧費迪南等。
忠臣老將都冇情講
呢份名單中，有5個球員下季離隊嘅機會比較大，除咗一早已經肯定會走嘅隊長尼曼查維迪之外，仲有艾拉、里奧費迪南同傑斯3位老將，同埋1月已經被外借到意甲費倫天拿、連個「冧巴」都俾桑馬達霸埋嘅路爾斯安達臣。其實，安達臣一早就被放棄㗎喇，而年老嘅里奧同傑斯狀態都下滑得太緊要；艾拉算係keep得比較好嘅一個，但莫帥一直都想清洗呢位麻煩友，搵個後生啲嘅取代佢。
名單中另外有5位球員，但走嘅機會就相對細啲，佢哋分別係「跳水」叻過踢波嘅楊格、被認為未夠班嘅湯卡、成日當自己係前紅魔icon基斯坦奴朗拿度嘅拿尼、唔受重用嘅香川真司，同埋踢後衞但攻多過守嘅阿歷山大畢拿。
球隊四大皆空又「地震」，今季受傷患困擾好少上陣嘅費查，就喺呢個時候出嚟鼓勵隊友，佢話：「就算最後乜嘢錦標都攞唔到，都要盡力踢好每一場波，證明自己值得留喺曼聯，更何況我哋仲有機會爭取下季踢歐洲賽㗎！」老大哥費查呢番說話，總算畀魔迷見番啲好耐都見唔到嘅曼聯打不死精神。
對皇馬波飛極速售罄
大家可能會擔心曼聯冇歐聯踢，收入減少就買唔到球星重建球隊，搞到好似早幾年嘅利物浦咁。唔使驚，雖然成績麻麻，但紅魔吸金力冇乜受到影響，佢哋已經約咗皇家馬德里，喺8月一齊去到美國密歇根大學嘅球場踢季前熱身賽，門票仲喺1日之內賣晒，相信賣咗多達10萬張！
