【尖沙嘴】現年51歲嘅劉以達同結婚15年嘅老婆冼美珍成日都糖黐豆，前日下晝6點幾，佢哋兩公婆又孖咇遊尖沙嘴文化中心，凸腩劉以達煙癮大發行咗出戶外chur煙，冼美珍就趁機去廁所，各有各忙完後再會合，劉以達見番老婆仲邊吸煙邊腳印印，動作好麻甩。
幫老公按摩掃背
劉以達同着住短褲嘅冼美珍，拍住拖行咗去天星碼頭，沿途有粉絲認出劉以達邀合照，佢好友善有求必應，不過冼美珍就避忌行開，影完相佢哋就行咗去附近七仔，原來肚仔餓，劉以達入咗去買飲品同零食，跟住出嚟就同老婆去咗的士站。
行喺老公劉以達後嘅冼美珍好識做，佢不時出手幫老公按膊頭同掃背，當佢哋排隊等的士。劉以達忍唔住撕開手上香腸食，耷低頭嘅佢好專注搣開腸仔嘅膠衣，佢搣嘅手勢似搣香蕉，好鬼搞笑，跟住佢就大啖大啖狂食醫肚，佢自己咬咗兩啖，就將一截斷腸隊入身邊老婆個口，冼美珍食得好滋味，一臉冧爆，率性嘅劉以達懶理歌手形象，當街同老婆開餐，大晒恩愛。
採訪、攝影：徐錦池、畢紹基、陳辰