嚴格來說，是一個局！
處女執導的陶傑，用糖衣包裝《愛．尋．迷》，以情色吸睛，引誘你打開桃色包裝，其實暗藏玄機，100分鐘明譏暗喻，還有一連串的反諷，以手榴彈轟炸式投擲在銀幕上，讓大家透視陶傑眼中的變形香港。
病態社會孕育失衡的男女關係，洗頭仔色誘離婚闊太，再生擒搞基兒子；留學金融才俊，搭上準特首夫人；殘缺家庭窮書生，戀上內地援交學生妹。三段畸戀，三場床戲，揭示色慾都市背後，已經危機四伏。所以，陶傑拍情慾電影和特首普選一樣，都是一個局！
撰文：楊潔雯
陶傑寫專欄一針見血，主持電台節目辭鋒銳利，報紙筆錄口述鹹濕古仔，引人入「性」，今回他嗌咪拍情慾片，果然嘩聲四起，一開始大家以為才子要拍陶傑版3D《肉蒲團》和《一路向西》，他說：「我整出嚟唔係嗰啲嘢，𠵱家嗰啲四仔，露點隨便download，但係情慾唔等於低俗。」
口誅筆伐，陶傑揮灑自如，拍戲，又是另一回事，才子自謙說：「係咪眼高手低我唔知，我只係覺得呢個世界係有好多嘢，電台唔講得，支筆嘅篇幅又寫唔到，同埋篇幅又細，將一啲電台講唔到，筆寫唔到，篇幅容納唔到嘅其他嘢呢，就係電影喇！」
人格保證
一頭亂草，滿腹大計，陶導演入型入格，不過，他強調不是為了做導演而導演《愛．尋．迷》，陶傑拉一拉衣袖，縮一縮肚說：「我細個好鍾意睇電影，我對港產片好有感情，咁𠵱家呢個時候有人叫到我，我覺得身為一個香港人，回饋吓個社會，拍呢套戲賺乜嘢錢箒！大陸就唔會入，想講番一啲我想講，同埋好多人想講嘅嘢。」
陶傑第一次執導，找來羅霖、關楚耀、Mandy Lieu等演員，一齊為藝術犧牲，他偷偷掩嘴笑道：「我又係第一次嘛！一齊犧牲，集體破處，咁唔好咩？大家都減少恐懼，攬住一齊！哈哈哈！」鐵達尼式跳海，你跳我跳，陶傑感激一班奮不顧身的演員說：「六個演員，仲有龔慈恩、張國強，佢哋對我真係好，佢哋對我有期望，我所能夠保證係，我拍出來唔係猥瑣，我唔會bad taste。」
陶傑以人格保證，游說三個女演員為藝術犧牲，他說：「我係好彩，Mandy Lieu好寸㗎！我一講Mandy Lieu，就有人話唔好搵佢呀！寸過碼頭咕哩，美國血統，眼角好高㗎！一開始就話唔拍，之後聽完，原來佢睇好多英文小說，覺得呢套戲有好多英文小說味道。盛朗熙，第一次，玉女型，畀晒成個背脊你，羅霖唔使講，kiss戲都未拍過，證明呢個世界係要講動機同誠意，啲人係會做！所以咁多人信我，我係唔衰得，喺有限嘅籌碼，金錢之內，我係要做到最好。」
集體犧牲
陶傑破處之作，床戲是賣點，不是重點，不過，男人講到床上戲，總是眉飛色舞，陶傑在適當的位置將聲調提高，說：「電影係要度，嗰三場床戲都要因應唔同性格，Mandy嗰場激情嘅，將條仔掟落床，然後上去𡁻佢。關楚耀嗰場係服侍型，個闊太係久旱逢甘露。咁徐天佑嗰場床戲，個女仔喺上面，就好似個天使咁樣，令徐天佑得救，所以我拍到第三場係希望拍做愛時，感覺到有啲聖光，就等如一個行到絕路嘅人，搵到救贖一樣。」
醉翁之意不在酒，說穿了，《愛．尋．迷》可不是一齣情慾片，被戳穿的陶傑，不禁嘻哈大笑，說：「聰明人至睇到好多message，你要知道，70蚊張飛，我係收人錢，我要向消費者負責，我套戲冇3D，冇龐貝古城，冇2012山崩地裂，我要人70蚊攞最多嘢走，in term of你哋講嘅message，我就會講係感受同埋思考。我希望係好多男女唔同階層可以睇，三個男主角有蘭桂坊蒲友，有基層窮人，有知識分子，三個女人有大學留學生，或者係新移民，俗稱蝗蟲，另外一個係特首夫人，權貴，亦都有老公做商界，政商，每一個觀眾唔同男女階層，睇到自己某啲reflection，知道熟知嘅嘢，怪獸家長，港孩，𠵱家周圍都係發生緊，我相信電影係要有反諷，冇反諷係不成電影。」
拍文藝片
陶傑對香港和本土文化，有着莫名的使命感，他說：「𠵱家我係想recall番文藝片，香港港產片文藝片冇咗20年，中間都有人拍過，但係唔得，20年前有《最愛》，上一套就叫做《甜蜜蜜》，之後係冇喇！幾大鑊，𠵱家香港呢一代，八、九十後佢哋個mindset，個心態係畀嗰啲3D同大規模嘅槍戰動作洗咗腦，佢哋唔可以bored，但係我相信電影好似美食咁，裏面嗰啖味道係要慢慢嗒，要慢火煲老火湯咁，係要時間，𠵱家我想call番個片種出嚟，𠵱家個社會係有多一個片種係文藝片，如果冇係唔正常！」
場地提供：Wheelock Gallery （Farrington Interiors Ltd）