下周日英超爭標前哨戰利物浦主場鬥曼城，大戰前夕紅軍先壯聲威，蘇亞雷斯同謝拉特一齊獲選為3月份英超最佳球員，領隊羅渣士帶領球隊上月全勝，理所當然做埋最佳領隊啦。不過，一路都話呢兩個獎項有魔咒，今次利物浦仲一次拎3個，真係唔知係好消息定壞消息喇。紅軍喺周四發佈下季新主場波衫（上圖），今次款式冇咗個領，利迷最希望當然係配埋金色英超臂章啦。
另外，曼城喺下周日將會強陣出擊，前鋒阿古路可望傷癒復出；至於傷勢已經冇大礙嘅中場絕對主力耶耶托尼，日前就同前利物浦中場列納傾吓偈，佢都認同紅軍今季表現好令人驚喜，呢次碰頭對爭標有非常重要嘅影響。
