巨無霸新股萬洲國際（288）開始路演，有成30間承銷團助陣，昨日投資者推介會場面當然好墟冚，不過睇嚟基金經理對佢啲豬肉產品嘅興趣，仲大過投資公司。
話說萬洲昨日喺會場擺咗一枱旗下肉類產品，諗住俾投資者認識吓個品牌，點知推介會後唔少人睇睇吓居然順手拎走埋，結果一枱食物唔見咗近半，連擺係側邊做裝飾嘅小膠豬都唔放過，全部俾人攞清光！
聽講話投資者咁積極搶貨，係受到萬洲管理層「鼓勵」，但負責擺設嘅工作人員就好緊張，事關佢哋一心只為擺設，無留意到產品食用限期，睇嚟投資者試食之前真係要望真先嘞。
小豬仔受歡迎，另一隻「朱」、即一度被停工嘅瑞銀賓架朱俊偉（Joseph Chee）同樣搶晒風頭，昨日復出後現身推介會，雖然唔肯講復出感受，但風采依然呢！