因為《紅VAN》小說，Mr. Pizza由網絡作家變成電影紅人，現正偷偷寫第二部小說兼學做編劇，卻仍然堅持網絡世界的隱身方式，訪問前聲明不准拍照。這名二十出頭的年輕小子，從舉止談吐看得出他充滿想法，說話時彬彬有禮，只為迎合高登友口味，才將筆下人物塑造成粗口橫飛的角色。直言寫《紅VAN》時沒有想太多政治隱喻，卻十分認同陳果的香港沒有出路的暗示。
採訪：文國駿、馮國康
記：記者 Ｐ：Mr. Pizza
記：當初點構思呢個古仔？
Ｐ：其實係想寫香港人喺末世環境下求生嘅古仔。最初唔係紅Van，係飛機，個藍本係飛機降落赤鱲角機場後冇晒人，要諗辦法出返九龍。認真諗發現飛機太多人，每人講一句對白，個古仔已經完。的士又太少人，所以就紅Van。寫小說嗰陣時好迷失，畢咗業又唔知搵乜嘢工，之後係雙失狀態。所以點解紅Van嗰種feel咁迷失，都有啲關係。
記：有冇諗過小說會喺網上咁爆？
Ｐ：冇喎！一開始其實係玩，諗住冇人睇就可能寫一、兩個chapter就算。點知有人睇有反應，嗰陣好開心，就有動力繼續寫。
借角色講出想法
記：有冇因為見高登反應好，喺方向上作出調節，或者迎合巴打口味？
Ｐ：粗口囉。粗口呢個元素係迎合佢哋。姦屍反而係鋪咗好耐，因為想搞到好末日feel，好似所有人都好唔正常咁。個古仔其實由頭到尾冇改過。但The Fact呢個表達方式，係後尾先決定用。因為嗰時心理狀態唔係幾好，寫到個人好stress，知道寫唔落去，當時又有schedule話畀讀者聽我要放大結局，但又寫唔切，結果take咗呢個考慮。
記：小說入面角色係取材自身邊朋友？
Ｐ：唔exactly係一個人。我係憑直覺，認為兩點半都仲未返屋企嗰種人係咩人。不過有啲唔係完全空想，譬如發叔，我覺得大部份過咗50歲嘅男人都係咁，覺得自己好啱，永遠都好有信心咁做任何嘢。最鍾意應該係阿池個角色，其實有代入咗一部份自己入去，嗰啲憤世嫉俗嘅諗法，我透過佢講出嚟。
記：睇完電影，滿唔滿意陳果導演嘅修改？
Ｐ：陳果導演將呢個古仔變成佢風格嘅嘢，出嚟都好interesting，本身我寫嘅時係冇刻意去諗政治元素，但so far套戲出嚟嘅政治觀點同我係完全相同。我知道部份die hard小說fans未必會鍾意呢個安排。