【第33屆香港電影金像獎頒獎禮之後日舉行】如果用屢戰屢敗來形容鄭秀文（Sammi）在影圈的成績，似乎有點跟實際情況有出入，好歹她02年憑《鍾無艷》成為香港電影評論學會影后，絕無不敬之意，確實戲好與否未必需要一個獎座來認同。不過今年Sammi所背負的跟過往不同，除了要孭起整套《盲探》團隊的榮譽，更要以一己之力單挑兩大影后章子怡、鮑起靜，看來上帝早已有預備。
撰文：何永寧
鄭秀文是香港電影金像獎的常客，先後4次獲提名最佳女主角，最經典一役是02年，她挾電影評論學會影后之名，分別憑《瘦身男女》、《同居蜜友》、《鍾無艷》問鼎金像獎影后寶座，不過最終不敵張艾嘉而飲恨。今年Sammi再接再厲以杜琪𥧌導演的《盲探》，單挑已經憑《一代宗師》宮二一角八度封后的章子怡及在《殭屍》中發揮神級演技的鮑起靜。
「落敗咁多次」
Sammi早前接受電話訪問，自言一向對於獎項沒有壓力，不過今年情況似乎有所不同，她說：「不過你提醒我，今年好似真係代表整隊團隊嘅精神。」原因是《盲》片在金像獎主要獎項提名中，只有最佳女主角一獎榜上有名，她說：「我好放鬆，因為咁多年看待呢啲獎項都係輕鬆心態，其實最初有提名嗰幾年，都會有啲唔同嘅心情，不過就唔係緊張，算係叫比較雀躍。𠵱家個心態簡單好多，因為都輸過咁多次，落敗過咁多次。」Sammi總結過往經驗就是無論獲獎與否，仍然抱住繼續做好的宗旨：「對於自己演戲嘅心態上冇分別，漸漸發覺原來攞唔攞獎，對我係冇差別，反而身邊嘅人會比較在意，仲緊張過我，成日覺得好遺憾，Sammi冇攞過呢個獎。」對Sammi而言，多次的落敗令她有所領悟：「喺落敗身上我學懂放鬆，仲會覺得好平常，從而變成一種動力，畀自己更加渴望可以遇到一個更好嘅角色，咁樣無論表演好、演戲好，唔會有任何局限。」
自言沒耐性的Sammi，多年來很難要自己坐下來看電影，不過從失敗中，她培養出看戲的熱情：「兩年前我開始培養狂睇戲，就真係喜歡咗電影，更加愛上演戲。」
「剎那間快樂」
兩年前開竅的Sammi相信跟人生經歷有關，她說：「做演員首先要將自己嘅部份縮細，同時又要將自己某啲部份放大，因為是用自己的情感同經歷去表達，所以放低自己好緊要。」純粹作為一個演員，責任是演好戲做完宣傳，不過這些頒獎禮遊戲是多年來存在，她說：「就衍生好似經常要衝擊呢啲獎項，咁多年都冇一種心態要衝擊呢啲獎項，你認同我嘅演出嗰年就入到，你唔認同，咪第二部重新嚟過，但其實每一次演戲都唔係衝住獎項去演。」回想成為評論學會影后的感受，她說：「感覺只係剎那間嘅快樂，最開心係藉住嗰個時間，多謝你想感謝嘅人，因為好多時冇呢個機會。」
最佳女主角提名：
章子怡《一代宗師》
湯 唯《北京遇上西雅圖》
顏卓靈《狂舞派》
鄭秀文《盲探》
鮑起靜《殭屍》
資料來源：香港電影金像獎協會