「唔帶遮先嚟落雨」是噚日「港滬直通車」的真實寫照，Samantha去到絕望星期四，體力已感不勝負荷，炒股意志在過去數星期已磨滅得八八九九，報價機都唔想開，眼見港交所（388）停牌，李克強講港滬股市互聯互通，冇反應。心諗：未有咁快出嘅！點知去到一點，中證監已即時公佈大綱，回頭望券商股、AH折讓勁的股份早已開車，每架車都幾成幾成咁衝上去，機會是不會留給疏於防範的人，最後代價是貴幾十格追車罷了！
若大家不是對直通車的狼來了故事心存恐懼，亦唔相信官員所說AH股基本上無差價，望住罕有的千億成交，噚日又趕唔切上車，心急搵架車上的朋友，深圳上市的千祈唔好上，寧揀基本因素好的博一博，從事污水處理廠及相關配套設施的天津創業環保（1065）就是其中一隻，剛公佈的全年業績增長4.8%至2.82億人仔，加上污水處理運營和各項工程帶動，營業額錄得增長4.8%。
更重要是總理把金口，在博鰲亞洲論壇上總理篇演講好似搞到工作報告咁，當中提到積極推動綠色工業、新能源、節能環保技術和產品開發，天津創業環保食正呢兩個概念。舊年12月趁着霧霾天氣惡化大幅炒上，上季呈上落整固的格局，在直通車推波阻攔下，終於大成交一口氣突破橫行通道，可望繼續創高峯！
Samantha
本欄逢周一、三、五刊出