泛民上海之行，劇情其實早已寫好，所謂成功爭取與中央官員單獨見面，不過係「借位」扮打真軍，好向市民有所交代。此行姿態多於實際，亦是北京一手硬一手軟策略。
打佔中則凶神惡煞左到無倫，放出惡狗「一錘定音」，大談為防佔中引發動亂，需要出動解放軍平亂時冇法律依據，因此需考慮將內地國家安全法引申至香港。如果咁都成立，不如索性宣佈一國兩制提早結束。之前兩會時由政協李家傑發炮，跟手已開足火力狂砌鍾庭耀，亦係衝住佔中公民投票而來，否定鍾庭耀公信力，至於半年來大力整治香港傳媒，當然不會為689提振民望，而是要打擊支持佔中之輿論陣地。
另一手軟則在營造北京同泛民有得傾之氣氛，上海行就係其中部署，泛民內各有算盤，北京現真身，睇怕泛民都冇乜共同策略去回應，只得見步行步。上海行之成敗，其實取決於實質上北京會否對公民提名作讓步。
最近由新力量網絡學者為主力提出「公民提名」方案，將中央篩選權放在「出閘」，即入閘可以寬鬆，容許公民提名，但出閘則由提委會把關。此所謂有公民提名成份之方案，北京未必會拒絕，但泛民受唔受，相信佢哋自己都未傾清楚。
首先佢哋應該要有共識，守邊一條底線，究竟「公民提名」係咪必需？其實泛民政黨一直唔太落力爭取，只係學民思潮、學界及社運界多提。如果可以妥協，則在乜嘢條件下妥協，如果冇共識，好快就會立立亂互相指摘。假如泛民政黨認為要走政治現實路線，則必須公開向市民講清楚原因及當中考量，而非各說各話，猶如2005及2012年兩次政改表現，一塌糊塗。
形勢已變 泛民難再兩邊食
泛民最大敵人唔係北京，而係自己。形勢已經冇得兩邊食，一係選擇群眾運動路線，堅持公民提名無篩選原則，全民動員以期在佔中最後商討日及公民投票中勝出，在民意基礎上打一場硬仗，包括佔領行動、綑綁投票，令市民明白即使原地踏步，也總好過誤入歧途。如果選擇談判路線，就要有底線，時限、部署一樣要仔細，否則會兩邊拉扯而失晒方寸。
觀乎今次上海行泛民各黨派前前後後、左左右右，只顧擺政治姿態，連一份共同告香港市民書都欠奉，上去為乜、講乜、有乜期望及評估，至少有個清楚說法及交代啩？
上海行究竟會為普選帶來乜嘢，相信大家都心中有數！
添馬男