百年老店先施（244）都算見證咗香港零售市道嘅盛衰。自從喺2001年不敵金融海嘯而敗走銅鑼灣利舞臺廣場，闊別13年後又再重返銅鑼灣！昨日喺波斯富街嘅新店開幕，雖然規模不及之前利舞臺連租5層咁有霸氣，但呢份「喺邊到跌到，就喺邊到企返身」嘅精神都好令人佩服。
過去一年，先施連環喺中環、旺角及銅鑼灣開新店，無論面門、裝修、產品都煥然一新。行政總裁馬景煊（Philip）都講明喺想吸引年輕客群，今次新店仲會賣埋韓國服裝，務求食正韓風。咁落力開店，但Philip其實唔多睇好今年零售市道，「股市Chok上Chok落，零售就係探熱針，股市大旺果陣，啲人就會買得爽手啲」。
同場馬太亦盛裝撐場，對上一次旺角開店佢都有去，咁支持老公，相信恨死唔少人。