社民連主席長毛梁國雄嘅粉絲，真係無處不在。話說今日會隨訪滬團去上海面斥京官嘅長毛，噚日出發前一日拿拿臨去上環間中旅社，主動申請特事特辦一次性通行證，想攞住呢張證跟大隊上海。
一直「無證」嘅長毛，似乎唔多清楚申請程序，去到中旅社時以為即時有得拎，點知「竟然」要排隊攞籌、之後又要影證件相、填表等等，搞完一大輪，擺低百二蚊，仲要等通知先真正有證在手，佢話喎：「上次（03年到內地探望母親）奔波咗3日先攞到證，今次進步咗，3個字（15分鐘）就得，但𠵱家未到手。」
長毛等辦手續期間，有小朋友主動上前要求合照，佢當然無任歡迎，之後又有位男士匆匆走上前拍佢膊頭鼓勵，溫馨講咗句：「小心啲呀。」可能怕佢喺上海出事。六四25周年臨近，長毛話呀，今次上去除咗反映港人希望冇篩選、有公民提名嘅意見外，亦會為內地政治犯發聲以及要求平反六四。