近年賭王何鴻燊幾房人除咗賭業，仲有不斷參與其他範疇嘅投資，好似一向極低調嘅二房三女何超蕸，前年無嗱嗱披露自己做咗川盟金融（8020）大股東，公司原本做開金融，但走去投資愛滋病藥，不過做咗年幾兩年，好似冇乜成績，公司星期一停牌，話有大收購。
隨時多單蛇吞象大刁
到咗昨日，最新一期台灣財經雜誌《今周刊》就驚爆，話川盟會染指台灣保險業務，據報道，台灣上市公司龍邦國際大股東朱炳昱，打算向川盟出售近19%龍邦股份，而龍邦就揸住37.2%台灣人壽，台灣人壽有87萬名客戶、涉及150萬張保單。《今周刊》仲話，川盟最終目的唔只揸19%咁少，終極目標要揸60%，做絕對控股股東，單計19%邦龍已經值33.6億元，等於兩間川盟嘅市值有多，如果成事，今年又多一單蛇吞象大刁。