上季玩完馬後炮，今季就做預言家，同大家一齊睇吓嚟緊周末有咩好睇。
題目：雲格要轉環境？
「要離開好易，留低卻需要好大勇氣。 」係香港第一任特首董建華金句之一。2005年董伯伯下台，差不多全港市民想開香檳慶祝，但看看兩位接班人，一個貪到街知巷聞，懶理樓價上升，另一個更加不堪入目，港人港地唔夠兩年已經消失。小弟忽然間好想董伯伯做番特首，起碼可以百幾萬就買到將軍澳新樓。
雲格早董伯伯一年上任阿仙奴領隊，今時今日香港特首換咗3個人，佢仍然在位。周六英足盃準決賽，係阿仙奴能否打破9年無冠詛咒第1關；在英超前4競逐亦被愛華頓力追。誠如咖喱兄所言，就算兵工廠最終拎到英足盃兼保前4，又係唔係英超傳統班霸就滿足嘅成績呢？
雲格真係冇野心？以往阿仙奴與曼聯爭一日之長短，曼城仲係中下游甚至護級分子，但到今時今日錢唔夠人多，將目標下調只可嘆句為勢所逼。事實季初重槌收購奧斯爾，雲格都雄心壯志爭英超冠軍，但主力傷吓一個又一個。戰術上，雲格甚至比費Sir更願意改進，以往擅長雙翼加雙防中，隨住世界潮流，今季逐步要求球員控球在腳為先，奈何韋舒亞等追唔上教授嘅要求。
其實作為廠迷，呢幾年，年年想聽雲格將被炒或者離隊消息，但冇一次成真，今次基本題目已經多餘，最應該問一問廠迷，係唔係應該要換一換愛隊（先利申，我唔會）。文：牽牛