兩大MK-Pop元祖阮民安同新仔天堂鳥噚日喺旺角正面交鋒，出席「《紅Van》主題真人冒險遊戲」，冇見一排嘅樂壇小強阮民安脹爆現身，身高比天堂鳥矮一大截，天堂鳥向阮民安鞠躬禮貌周周，點知樂壇小強表現得唔係好like，令場面有啲尷尬。
求其交棒
司儀問阮民安有乜嘢心得可以過畀後輩天堂鳥？阮民安即刻放狗落閘話：「唔好嗌我做前輩，冇乜嘢教，佢哋咁靚仔，努力囉！我今日着咗增高鞋，都唔夠佢哋高。」司儀叫阮民安交鐵棒畀天堂鳥，寓意「打不死精神」，阮民安反應甚大：「吓？咁古怪？」結果求其完成儀式。
之後馮仁昭要求一起做訪問，阮民安表現勉強似乎睇唔起人，問佢點睇天堂鳥？佢抵死話：「都OK啦，我識佢哋背後啲人，唔可以亂講嘢。」
天堂鳥有冇嘢想請教前輩？佢哋話：「有嘢想問，如何平復自己心理？」阮民安笑話：「即係踩我唔死，聽我歌幾開心㗎，豁出去都幾開心㗎！」會唔會同天堂鳥合作？阮民安話：「嘩，整首《魅力太陽》（《魅力移動》X《登陸太陽》）呀？等我同兩位成員傾傾先，佢哋都唔知去咗邊，睇吓佢哋有冇興趣復出囉！」
撰文：馮仁昭