上季玩完馬後炮，今季就做預言家，同大家一齊睇吓嚟緊周末有咩好睇。
題目：雲格要轉環境？
每年呢個時候，球迷都會討論雲格應唔應該離開阿仙奴，有啲忠實雲格迷總會搬出49場不敗嘅豐功偉績幫佢辯護，或者話球會唔泵水，雲格年年帶隊入前4已經好叻，作為阿迷應該要耐心咁等待收成期。
不過，阿仙奴年年成績都係咁，就快9年無冠，球隊原地踏步，小弟覺得阿仙奴同雲格應該分開吓，等大家都接受吓新思維。呢幾年嘅阿仙奴畀人一種不思進取嘅感覺，戰術一成不變，問題亦一直冇解決到；防中問題困擾咗好耐，球隊係爭個活動範圍大、搶截能力強嘅防中。雲格雖然免費簽番法米尼，但奇就奇在唔係成日用佢，有時夠膽死搵路斯基打防中都唔用法米尼，結果係點？咪收咗車路士6隻蛋囉。
喺防中問題度睇到，雲格有啲固執，或者叫做過份理想，佢一直都好希望阿仙奴成為一支踢漂亮足球嘅球隊，但有時太偏重好睇，令到陣容上缺乏實用嘅防守球員，隊波唔得平衡。阿仙奴真係窮到連防中都買唔到咩？其實現今球壇唔缺好防中，英超入面價廉物美嘅都有唔少啦。
另外，年年季初話夠人，但季中就成籮傷兵，如果間中一兩季係咁，可以賴運氣，但季季都重覆同一劇情，似乎唔係偶然，但雲格睇嚟麻木晒，將呢一切當成自然。因此，小弟覺得阿仙奴需要改革，而雲格唔似係呢個改革者。文：咖喱