之前提過，讀書叻同搞startup成功與否，關係不大，一個原因，是學校教的，着重點做，做startup，摸出市場要甚麼，更難，也更重要。
仲有一個原因。學校裏面，永遠是單打獨鬥，我識好幾個朋友，如果要讀書上隻揪，我會滴汗，走為上着。好在走出校園，無規矩講明要一打一，基本上你出幾多人，無上限，忽然間，遊戲完全改變，領導startup，吹雞的能力，比起個人能力，重要得多。
有個朋友，當年會考9A，一路名校，她說，回望讀書時，最大遺憾，是玩運動只攻游水，無參與過隊際運動，自言如果當年有機會玩隊際運動，學到的領導能力，今日創業應該會大派用場。
話事人最怕拖累隊友
做startup，一個大好處，是可以有好勁的隊友。我認識的團隊，大部份隊員，都有一定水平，我估其中一個原因，是startup比大機構透明，基本上冇得匿埋，見過不少例子，找工作時，自信心不夠，反而走去揀做大公司，怕在startup冇人在上面照住。
如果問，做startup每日最大的快樂是甚麼，我會話，其中一樣，是可以同高水平的隊友並肩作戰。有時，停一停，想一想，團隊由無到有，一個一個親手請回來，越來越多勁人加入，各人身懷絕技，即覺難得，應該感恩。
是快樂，也是恐懼。我知道有好多startup話事人，最大的包袱，就是對隊友的責任，正正就是因為隊友都是勁人，如果最後失敗，好對不住大家。
當然，你可以說入得startup，應明知風險，但大家心知，隊友都是把最好最寶貴的歲月，押注落你搞出來的這家公司，大家幾青春無敵，幾理想主義，都要食飯，都要生活，總會有想買樓結婚生仔的一日，搞不好，話事人自責少不免，而最弊startup十間死九間，是規律。
搞startup，最最不想見到的，是跟了你幾年的隊友，自覺浪費了青春上錯船，而隊友一般不會當面講，只是公司失敗後創辦人自己形住形住，先攞命。
我估，創辦人通常傾向過份自責，公司摺埋後，創辦人自己也會摺埋一段日子療傷，其中最要療的傷，就是令隊友失望的自責。
當然，恐懼不盡是壞事，可以扭成動力，每一次遇上艱難的決定，想起自己失敗事小，成隊人失敗事大，唯有頂硬上，所以你見，懶型的創辦人，通常是新丁。
做了好些日子的，已經不再關心型不型，要捱到岸這麼難，話之行到去抑或爬到去，總之到埗要緊，死都死掂佢。
宋漢生