人行上月煞停互聯網金融，周圍辣火頭嘅阿里巴巴創辦人馬雲，最近不斷俾內銀圍插。
招行（3968）前行長、永隆董事長馬蔚華噚日喺博鰲論壇怒斥，餘額寶根本「不管用」，話呢款搶銀行存款產品嘅出現，只係因為中國仲未實現利率市場化，仲話馬雲唔應該「非法集資」、「隨便吸收公眾存款」喎。
喺同一場合嘅民生銀行（1988）董事長董文標亦都加把嘴話：「馬雲你不要都革命了，你也沒那本事。」又話餘額寶、P2P等對民行嘅業務影響有限，覺得做金融一定要「虛實結合」，而馬雲唔只係識做虛，「這個東西大家不要擔心，也不要擔心我們成了末代恐龍或者甚麽傢伙。」
不過，馬雲噚日都冇喺來往發文還擊，好似已經封口，唔再公開談論互聯網金融，而佢之前形容支付寶「雖敗猶榮，雖死猶生」嘅博客，都疑似自我河蟹咗。