利豐（494）舊年嘅核心經營溢利雖然按年升70%，但似乎董事局唔太滿意管理層嘅表現，三位核心人物主席馮國綸、CEO樂裕民（Bruce Rockowitz）同準CEO馮裕鈞舊年人工大縮水。
馮氏父子舊年人工分別為1,976萬同811萬，雙雙減薪超過四成，最「可憐」係Bruce，舊年份人工唔見咗55%，得返2,406萬，但依然係全集團人工最高一位。
華華細讀利豐年報，Bruce減得最甘嘅係酌情獎金，足足唔見咗61%獎金，呢筆獎金係因為2012年表現而畀，點解人工大縮水，相信最心知肚明嘅係Bruce。
唔怪得之前利豐宣佈分拆品牌公司GBG時講明，Bruce會降呢做GBG嘅CEO啦；不過對於搞個婚禮都花過億銀嘅Bruce嚟講，減薪都未必好肉痛，相信老婆李玟（Coco）買衫都唔駛就住嚟。