八卦雜誌話譚小環有藝員唔做，轉行走去賣魚蛋，睇番段片，記者仲問呢位94年港姐冠軍介唔介意被人稱呼做「魚蛋妹」。呢單嘢反映兩個事實：一，就係賣魚蛋好搵過同TVB打工；二，記者認為做「魚蛋妹」係較低層次，應該要介意至啱數。
前者唔使講得多，TVB人工出名低，自己搞生意博一博總好過入去俾人壓榨；至於後者，魚蛋貴為香港飲食文化代表之一，幾蚊一串，每日不知醫飽幾個人個肚，又養活幾多個家庭，直頭反映香港核心價值，到底哪裏來介意的理由？
查實要喺香港靚嘅地段開檔賣魚蛋，身家冇番咁上下實力都做唔到。好似譚小環而家喺銅鑼灣渣甸街個150呎舖位咁，月租都要11萬，以佢賣10蚊串計，每日要賣370串先夠交租。370串話多唔多，話少唔少，但借港姐效應，要達標應該唔難。
近年香港唔少食肆都俾「租魔」趕走，但眼見可以力挽狂瀾，於旺區生存到嘅，彷彿就好似只得魚蛋檔。好似連LV都唔敢租嘅羅素街，竟然仍有一間魚蛋檔生存到，香港美食贏到開巷。至於已經撤出香港嘅「13座牛雜」北角舖位，亦已被一檔魚蛋舖承租。尖咀賣雞蛋仔賣到出晒名嘅豐記，亦要兼賣魚蛋先可以頂住20萬月租。所以有理由相信，於癲價租金下，生命力最頑強嘅本土文化非魚蛋莫屬。
Fifi
本欄逢周二、四刊出