股票市場裏面，我哋經常聽到有好多英文字母。有啲英文字母代表股票分門別類，例如A股，另外又有啲英文字母代表上市公司嘅名稱，最著名係TOM集團（2383），創業板上又有IGG（8002）。
不過，有啲英文字母，只係攞個英文字母嘅形態，具體咁反映某一個時段資產，喺圖表上呈現嘅狀態，例如有L形橫行、M形頂、W形底、U形/V形反彈、J形升市，今日先同大家講L後講J。
第一個就係L形橫行形勢，L形，即係代表資產從高位急速下跌，之後一直徘徊在低位橫行。講起呢個情況，就唔能夠唔提2008年金融海嘯期間，澳元跟隨美元，一條直線咁樣，急速向下跌至八年半嘅低位，之後一直留低徘徊嘅L形走勢。
L形嘅股市，代表住一啲極唔尋常嘅金融事件，同時亦正好提醒投資者，投資股票時，唔好一味將注意力集中喺股票價格嘅上落，收到消息就衝入去！同時亦應該保持警剔，好好注意各種潛在嘅風險。
如果大家有留意，市場出現咗一種新嘅市場形勢叫J形態，係U形市場嘅後續，即係市場回升之後，不斷保持快速上升嘅趨勢，首先出現J形市場係各地嘅房地產市場，主要原因，就係美國寬鬆貨幣政策同中國大幅增加信貸，刺激投資活動，特別係樓市，喺金融海嘯後，價格已由高峯大幅回落，刺激各地投資者入市，過去一年全球有十大市場，包括杜拜、中國、香港、台灣、印尼、土耳其、巴西、哥倫比亞、德國等，平均有11%以上嘅直線增長！
TCL多媒體有潛力
J形狀態，可以話係投資嘅最理想狀態。J形股票，就代表呢間上市公司嘅潛力。潛力包括市場嘅需求、公司嘅規模、業務嘅重新發展同探索，呢啲都需要公司一早已經有全盤計劃，早有準備。當機會一嚟，仲使講，股價就會自然爆到你唔信。TCL多媒體（1070）正正開始有咗「小J」形態！炒股講cycle，又要講angle，得咗！望實先！
徐燦傑
中國銀河國際財富管理主管
本欄逢周四刊出