糾纏多時嘅唐宮僭建案，噚日終於有定論。法院裁定三個負責唐宮建築工程嘅被告全部罪名不成立，唔只被告鬆一口氣，相信唐英年都係咁話。
唐宮案判前退休
呢個裁決喺政圈都惹起熱議，唐營人士自然為唐唐抱不平，話個官話明無直接證據顯示僭建部份係07年攞咗OP、即入伙前建造，而唐唐喺選特首時，就係因為呢一點大受梁粉攻擊，中央當時亦好驚唐唐當選後若被證明攞OP前僭建就大鑊鳥，最終轉撐狼英，造就689當選奇聞。
另有政界中人笑笑口話，屋宇署前署長區載佳走得快好世界，事關佢啱啱喺3月底退休，若然仲在位，勞師動眾下得個桔，加上屋宇署只檢控唐宮相關人士、冇檢控山頂貝璐道大宅有僭建嘅狼英，肯定會被議員窮追猛打係咪有政治打壓，唔要求佢公開交代先至奇。