立法會訪滬團周五晚啟程，周日嘅京官政改座談會，肯定係重頭戲，但主角只限京官同泛民咋喎，隨團嘅建制派個個變成大茄不特止，據聞仲被要求配合呢場破冰大龍鳳，喺會面期間盡量遲到早退等，以免成為電燈膽，阻住泛民同中央溝通。
稱要練習好演技
據聞建制派私下應承佈局交足戲。民建聯主席譚耀宗噚日講到明，民建聯成日都從大局出發，所以好樂意玉成其事，唔介意屆時提早退場見傳媒，等佢哋慢慢傾到夠。
另外，有建制派私下話，仲有好多方法鬆人嘅，例如扮出去傾吓電話、甚至詐吓肚痛或者借吓尿遁咁，話呢幾日要練吓點樣唔會俾人話演技太差。
但有人都唔多like齋做佈景板。新民黨田二少噚日有啲酸溜溜咁話，唔明點解上海行好似淨係泛民要溝通，其實建制派都有嘢代市民向中央反映喎。